24 Eirat - ٢٤ قيراط El Joker - الجوكر

[المقطع الأول]
حبيبتي، حافظي ع العهد اللي بيننا ودايماً إفتكريني
لو الليل حاوطك في يوم وما إتصلتش كلميني
ودعها وسافر، سنتين وأكتر بيعافر
١٨ ساعة شُغل وياكل أرخص شيء يتاكل
ويصبر نفسه بفكرة حوش أكتر ترجع أسرع
ويوفر حتى السكن بإنه يبات مع أمن المصنع
وفي ليلة إتقبض عليه نتيجة خطأ تحقيقات
لإنه كان بيصلي في جامع إتخطط فيه لتفجيرات
قال إيه بيهدد أمن الدولة فبالطبع إتخفى
في سجن فيه كورسات تعذيب يومية ومُكثفة
ما فادهمش بحاجة، وما إحتاجوش دليل إدانة
علشان يرموه في زنزانة لحد ما كل التحقيقات تتقفل
إترحل لبلده بعد عذاب ١٦ شهر
مش باقي من تحويشة عُمره طبعاً إلا قهر
دخل على أهله البيت، الكل حضنه في نفس الوقت
أمه وسط دموعها قالت لأبوه أهو عايش أهو، صدقت؟

[اللازمة]
الحياة ممكن تتعبك والمجهول يبدأ يرعبك
بس اللي لا يمكن يحصل تتجه لله ويخذلك
اليأس نهاية، كل شيء موجود لغاية
الشمس بتطلع كل يوم تقولك إبدأ تاني معايا
الحياة ممكن تتعبك والمجهول يبدأ يرعبك
بس اللي لا يمكن يحصل تتجه لله ويخذلك
اليأس نهاية، كل شيء موجود لغاية
الشمس بتطلع كل يوم تقولك إبدأ تاني معايا