Yad Ölkədə Uran

[Bənd 1]
Həyatda yeni səhifə açıldı, dəyişdi gedişat
Düşdüm Fransaya, Lö Gişe, deyiləm pərişan
Ata oldum, sayrışan ulduzum - qızım, yeni guşəm
Anladım, valideyn bir rütbə, nə sənət, nə peşə

Yeni iaşə, yeni məişət, yeni gündəlik nizam
Yeni baxış, yenilik axtarışı, yenilənir bazam
Beynimin idarəetmə mərkəzi, informasiya toplanışı
Yeni ilham mənbəyi, eynən, yeni mövzu axtarışı

Axşam çayxanası, laqqırtı, dost-tanış üzü
Bunlar uzaqlaşdı, ancaq “Facebook”, “Skype”a dikib gözü
Vətəndə baş verənlərlə maraqlanmaq
Bunu çoxdan bilirəm, nədir doğmalığa bağlanmaq

Amma kəşf etmək istəyi, yeni səhifə hərisliyi
Darıxmaq hissini unutdurur, beyindən təmizləyir
Təmizi deyim, sərxoş olanda gözüm görür Xəzəri
Bir az düşünüb gülür yad ölkədə bir Azəri, həri!

[Nəqərat]
Bunun yox bənzəri
Gah dərdli, gah məzəli
Mən yad ölkədə bir Azəri