Enfsam Had - إنفصام حاد El Joker - الجوكر

[المقطع الأول]
شر نفسي عليا بان لما إتقفلت البيبان
وعرفت إن طوق النجاة يكونلي حوافر مع نيبان
بقى الجو هو الملك، الناس حواليه بزمبلك
قمة السعادة وسط العبيد، إنت بس تمتلك
بيني وبينك يا أحمد جدار، أنا عليك سيد قرار
قول إنتحار أو قتل مع سبق الإصرار
ليه يا جو فرحان بشرك والشيطان في طريقه جرك؟
ناسي ربك، دينك، أهلك، والخضوع لأمرك غرك
إصحى فوق شوفلك دوا، ده وجود الجوكر فيك عيا
ياريت تصحى أحمد خلاص، كفاية دفنته بالحيا
وإنت يا أحمد كنت فين لما قسمتنا الدنيا إتنين؟
نص في كفة الناس داسوها ونص داس ع الكفتين
نص عاش ملك في غابة ونص إتدارى من الديابة
يا أحمد فكين المفرمة في زمانا مسكن الغلابة
عايزني أحييك؟ وأرجع عروسة في بترينه البوتيك
إنسى يا أحمد، رجوعك وهم ساكن بس فيك

[اللازمة]
واحد حي التاني مات، واحد عبد التاني ساد
واحد كان لازمله فرصة يبيع فيها التانى في مزاد
غايب حاضر بالهمسات، حلمه يحيي فيه اللي مات
ده يشد وده يشد، إتحول لإنفصام حاد
واحد حي التاني مات، واحد عبد التاني ساد
واحد كان لازمله فرصة يبيع فيها التانى في مزاد
غايب حاضر بالهمسات، حلمه يحيي فيه اللي مات
ده يشد وده يشد، إتحول لإنفصام حاد