Pasca d’ ’e rrose Ernesto De Curtis

Quanta rrose 'nce stanno p' 'e ciardine
I' tante nne vulesse 'sta jurnata…
Rose rosse 'e velluto senza spine
Comm' â vocca ca i' sulo aggio vasata!

Rose janche e gentile, comm' ê mmane
Ca teneno attaccato 'a vita mia…
'E rrose d' 'e paise 'e cchiù luntane
'E rrose ca nun nasceno a 'sta via!

Ma pe' mme…
Sò sfrunnate 'e ciardine!
Sò mmorte 'e rrose e sò…
Restate 'e spine!

Tu venisse… e truvasse, oi nè, 'stu lietto
Appriparato cu 'e ccuscine 'e rose…
Core, core! Tu comme sbatte 'mpietto!
Comm' è brutto a penzà 'sti belli ccose!

Comm' è triste 'sta casa e sulitaria!
Nun 'nce passa nisciuno pe' 'sta via…
Rose, rose! Ch'addore pe' chest'aria…
Manco 'na rosa… dint' â stanza mia!

Ca pe' mme…
Sò sfrunnate 'e ciardine!
Sò mmorte 'e rrose e sò…
Restate 'e spine!